పొరపాటున అలా అనేసి.. బుమ్రాకు క్షమాపణలు చెప్పిన రామ్ చరణ్

ప్రముఖ నటుడు రామ్ చరణ్.. భారత క్రికెట్ జట్టు పేస్ దిగ్గజం జస్‌ప్రీత్ బుమ్రాకు బహిరంగంగా క్షమాపణలు తెలిపారు. ఓ కార్యక్రమంలో బుమ్రాను పొరపాటున ఫుట్‌బాల్ ఆటగాడిగా సంబోధించడంతో ఆ తప్పును సరిదిద్దుకుంటూ ఆదివారం తన 'ఎక్స్' (గతంలో ట్విట్టర్) ఖాతాలో ఒక పోస్ట్ పెట్టారు.

"అయ్యో.. నేను కొన్నిసార్లు పేర్ల విషయంలో నిజంగా చాలా మతిమరుపుతో ఉంటాను. జస్‌ప్రీత్ బుమ్రా జీ.. నన్ను క్షమించండి. ఆ జనసందోహం, ఉత్సాహం మధ్యలో అది మానవ సహజంగా జరిగిన పొరపాటు మాత్రమే. నేను మిమ్మల్ని ఎంతో గౌరవిస్తాను. మీ ఆటతీరుకు నేను పెద్ద అభిమానిని. మీరు బ్యాటర్లను నిలకడగా ఒత్తిడికి గురిచేస్తూ ప్రతి భారతీయుడు గర్వపడేలా చేస్తున్నారు" అని చరణ్ తన పోస్టులో పేర్కొన్నారు.

గతంలో ఓ ఈవెంట్‌లో భారత క్రికెటర్ల గురించి అడిగినప్పుడు రామ్ చరణ్ మాట్లాడుతూ.. "బుమ్రాకు నేను పెద్ద అభిమానిని. నాకు ఫుట్‌బాల్ అంటే చాలా ఇష్టం. మీరు దానిని మరింత ముందుకు తీసుకెళ్తున్నారు" అని వ్యాఖ్యానించారు. ఈ వ్యాఖ్యల వల్లే తాజా గందరగోళం తలెత్తింది.

ఇక సినిమాల విషయానికొస్తే, రామ్ చరణ్ ప్రస్తుతం 'పెద్ది' అనే భారీ చిత్రంలో నటిస్తున్నారు. బుచ్చిబాబు సానా దర్శకత్వం వహిస్తున్న ఈ సినిమాలో జాన్వీ కపూర్, దివ్యేందు, శివ రాజ్‌కుమార్, జగపతి బాబు, విజయ్ సేతుపతి వంటి ప్రముఖ నటులు నటిస్తున్నారు. వృద్ధి సినిమాస్, మైత్రీ మూవీ మేకర్స్ సంయుక్తంగా నిర్మిస్తున్న ఈ చిత్రం 2026, జూన్ 4న ప్రపంచవ్యాప్తంగా విడుదల కానుంది.